按：汤啸庵拉罗子富坐下，说道："耐啥要紧 ？我说末，耐先教月琴先生打发个娘姨转去，摆起台面来。善卿坎坎来，也让俚摆个庄，等蔼人转来仔一淘过去，俚哚也舒齐哉，阿是嗄？耐第歇去也不过等来哚，做啥呢？"罗子富连说"勿差"。子富叫的两个倌人，一个是老相好蒋月琴，便令娘姨转去，看俚哚台面摆好仔末，再来。
洪善卿四面一看，果然不见朱蔼人，只有林素芬和汤啸庵应酬台面。还有素芬的妹子林翠芬，是汤啸庵叫的本堂局，也帮着张罗。洪善卿诧异，问道："蔼人是主人啘，陆里去哉 ？"汤啸庵道："黎篆鸿说句闲话，教俚去一埭，要转来快哉。"洪善卿道："说起黎篆鸿，倒想着哉。"即向陈小云道："荔甫要问耐，一篇帐阿曾拿到黎篆鸿搭去？"陈小云道："我托蔼人拿得去哉，我看价钱开得忒大仔点。"洪善卿道："阿晓得第号物事陆里来个嗄？"陈小云道："说是广东人家，细底也勿清爽。"罗子富向洪善卿道："我也要问耐，耐阿是做仔包打听哉？双珠先生有个广东客人，勿晓得俚细底，耐阿曾搭俚打听歇？"大家呵呵一笑。洪善卿也笑了。周双珠道："倪陆里有啥广东客人嗄，耐倒搭倪拉个广东客人来做做哉啘。"罗子富正要回言，洪善卿拦住道："覅瞎说哉。我摆十杯庄，耐来打。"罗子富挽起袖子，与洪善卿豁拳，一交手便输了。罗子富道："豁仔一淘吃。"接连豁了五拳，竟输了五拳。蒋月琴代了一杯，那一个新做的倌人叫黄翠凤，也伸手来接酒。洪善卿道："怪勿得耐要豁拳，有几花人搭耐代酒哚。"罗子富道："大家勿许代，我自家吃。"洪善卿拍手的笑。陈小云说："代代罢。"汤啸庵帮他筛酒，取一杯授与黄翠凤吃。黄翠凤知道罗子富要翻台到蒋月琴家去，因说道："倪去哉，阿要存两杯？"罗子富摇头说："覅存哉。"黄翠凤乃先走了。
汤啸庵劝罗子富停歇再豁，却教陈小云先与洪善卿交手，也豁上五拳。接著汤啸庵自己都豁过了，单剩下葛仲英一个。那葛仲英正扭转身，和倌人吴雪香两个唧唧哝哝的咬耳朵说话，连半日洪善卿如何摆庄都没有理会。及至汤啸庵叫他豁拳，葛仲英方回头问："做啥？"罗子富道："晓得耐哚是恩相好，台面浪也推扳点末哉。阿是要做出来拨倪看看？"吴雪香把手帕子望罗子富面上甩来，说道："耐末总无拨一句好闲话说出来！"洪善卿拱手向葛仲英道："请教豁拳。"葛仲英只豁得两拳，吃过酒，仍和吴雪香去说话。
罗子富已耐不得，伸拳与洪善卿重又豁起，这番却是赢的。洪善卿十杯庄消去九杯，罗子富想打完这庄，偏不巧又输了。忽听得楼下外场喊说"朱老爷上来"。陈小云忙阻止罗子富道："让蔼人来豁仔一拳，收令罢。"罗子富听说有理，便不再豁。朱蔼人匆匆归席，连说："失陪，得罪。"又问："啥人来里摆庄？"洪善卿且不豁拳，却反问朱蔼人道："耐有啥要紧事体搭我商量？"朱蔼人茫然不知，说："我无啥事体啘。"罗子富不禁笑道："请耐吃花酒，倒勿是要紧事体。"洪善卿也笑道："我就晓得是耐来哚捏忙。"罗子富道："就算是我捏忙，快点豁仔拳了去。"朱蔼人道："只剩仔一拳，也覅豁哉。我来每位敬一杯。"大家说："遵命。"朱蔼人取齐六只鸡缸杯，都筛上酒，一齐干讫，离席散坐。外场七手八脚绞了手巾，那蒋月琴的娘姨早来回话过了，当下又上前催请一遍。葛仲英、罗子富、朱蔼人各有轿子，陈小云自坐包车，一起倌人随着客轿，带局过去；惟汤啸庵与洪善卿步行，乃约同了先走一步。
二人离了林素芬家，来到尚仁里弄口，有一人正要进弄，见了忙侧身垂手，叫声"洪老爷"。洪善卿认得是王莲生的管家，名叫来安的，便问他："老爷呢？"来安道："倪老爷来哚祥春里，请洪老爷过去说句闲话。"洪善卿道："祥春里啥人家嗄？"来安道："叫张蕙贞。倪老爷也坎坎做起，有勿多两日。"洪善卿听了，即转向汤啸庵说："我去一埭就来，蒋月琴搭请俚哚先坐罢。"汤啸庵叮嘱快点，自去了。
洪善卿随着来安，径至祥春里，弄内黑魆魆的，摸过二三家，推开两扇大门进去。来安喊说："洪老爷来里。"楼上接应了，不见动静。来安又说："拿只洋灯下来 。"楼上连说："来哉。"又等好一会，方见一个老娘姨，手提马口铁回光壁灯，迎下楼来，说："请洪老爷楼浪去 。"善卿见楼下客堂里七横八竖的堆着许多红木桌椅，象要搬场光景。上楼看时，当中挂一盏保险灯，映着四壁，象月洞一般，却空落落的没有一些东西，只剩下一张跋步床，一只梳妆台，连帘帐灯镜诸件都收拾干净了。王莲生坐在梳妆台前，正摆着四个小碗吃便夜饭，旁边一个倌人陪他同吃，想来便是张蕙贞。
善卿到了房里，即笑说道："耐倒一干仔来里寻开心。"莲生起身招呼，觉善卿脸上有酒意，问："阿是来哚吃酒？"善卿道："吃仔两台哉。俚哚请仔耐好几埭哚，故歇罗子富翻到仔蒋月琴搭去哉，耐阿高兴一淘去？"莲生微笑摇头。善卿随意向床上坐下，张蕙贞亲自送过一支水烟筒来。善卿接了，忙说："覅客气，耐请用饭 。"蕙贞笑道："倪吃好哉呀。"善卿见张蕙贞满面和气，蔼然可亲，约摸是幺二住家，问他："阿是要调头？"蕙贞点头应"是"。善卿道："调来哚陆里？"蕙贞说："是东合兴里大脚姚家，来哚吴雪香哚对门。"善卿道："包房间呢？做伙计？"蕙贞道："倪是包房间，三十块洋钱一月哚。"善卿道："有限得势。单是王老爷一干仔末，一节做下来也差勿多五六百局钱哚，阿怕啥开消勿出。"说着，王莲生已吃毕饭，揩面漱口。那老娘姨端了一副鸦片烟盘，问蕙贞："摆陆里嗄？"蕙贞道："生来摆来哚床浪哉啘，阿要摆到地浪去。"老娘姨唏唏呵呵的端到床上，说道："拨来洪老爷看仔，阿要笑煞嗄。"蕙贞道："耐收捉仔下头去罢，覅多说多话哉。"那老娘姨方搬了碗碟杯筷下楼。
蕙贞乃请莲生吃烟。莲生去床上与善卿对面躺下，然后说道："我请耐来，要买两样物事：一只大理石红木榻床，一堂湘妃竹翎毛灯片。耐明朝就搭我买得来最好。"善卿道："送到陆里嗄？"莲生道："就送到大脚姚家去，来哚楼浪西面房间里。"善卿听说，看看蕙贞，嘻嘻的笑道："耐教别人去搭耐买仔罢，我勿来买。拨来沈小红晓得仔，吃俚两记耳光哉 ！"莲生笑而不言。蕙贞道："洪老爷，耐啥见仔沈小红也怕个嗄？"善卿道："啥勿怕！耐问声王老爷看，凶得来。"蕙贞道："洪老爷，谢谢耐，看王老爷面浪照应点倪。"善卿道："耐拿啥物事来谢我 ？"蕙贞道："请耐吃酒阿好？"善卿道："啥人要吃耐台把啥酒嗄！阿是我勿曾吃歇，稀奇煞仔。"蕙贞道："价末谢耐啥 ？"善卿道："耐要请我吃酒末，倒是请我吃点心罢。耐末也便得势，覅去难为啥洋钱哉，阿是？"蕙贞嗤的笑道："耐哚才勿是好人。"善卿呵呵一笑，站起来道："还有啥闲话末说，倪要去哉。"莲生道："无啥哉，后日请耐吃酒。耐看见子富哚，先搭我说一声，明朝送条子去。"善卿一面答应，一面下楼，仍至四马路东公和里蒋月琴家吃酒去了。
蕙贞见善卿已去，才上床来歪在莲生身上，给他烧烟。莲生接连吸了七八口，渐渐合拢眼睛，似乎睡去。蕙贞低声叫道："王老爷安置罢。"莲生点点头。于是端过烟盘，收拾共睡。
次日一点钟辰光，两人始起身洗脸。老娘姨搬上稀饭来吃了些，蕙贞就在梳装台前梳头。老娘姨仍把烟盘摆在床上，莲生自去吸起烟来，心想沈小红家须得先去撒个谎，然后再慢慢的告诉他才好。盘算一回，打定主意，便取马褂着了要走。蕙贞忙问："陆里去？"莲生道："我到沈小红搭去一埭。"蕙贞道："价末吃仔饭了去 。"莲生道："覅吃哉。"蕙贞又问："晚歇阿来嗄？"莲生想了想，说道："耐明朝啥辰光到东合兴去？"蕙贞道："倪一早就过去哉。"莲生道："我明朝一点钟到东合兴来。"蕙贞道："耐有工夫末晚歇来一埭。"莲生应诺，踅下楼来，来安跟了，出祥春里，向东至西荟芳里弄口，令来安回公馆去打轿子来，自己即转弯进弄。娘姨阿珠先已望见，喊道："阿唷，王老爷来哉！"赶忙迎出天井里，一把拉住袖子，进去又喊道："先生，王老爷来哉。"拉到楼梯边，方放了手。
莲生款步上楼。沈小红也出房相迎，似笑不笑的说道："王老爷，耐倒好意思----"说得半句，便噎住了。莲生见他一副凄凉面孔，着实有些不过意，嘻着嘴进房坐下。沈小红也跟进来，挨在身傍，挽着莲生的手问道："我要问耐，耐三日天来哚陆里？"莲生道："我来里城里，为仔个朋友做生日，去吃仔三日天酒。"小红冷笑道："耐只好去骗骗小干仵！"阿珠绞上手巾，揩了。小红又问道："耐来哚城里末，夜头阿转来嗄？"莲生道："夜头末就住来哚朋友搭哉啘。"小红道："耐个朋友倒开仔堂子哉。"莲生不禁笑了。小红也笑道："阿珠，耐哚听听俚闲话！----我前日仔教阿金大到耐公馆里来看耐，说轿子末来哚，人是出去哉。耐两只脚倒燥来哚啘，一直走到仔城里。阿是坐仔马车打城头浪跳进去个嗄？"阿珠呵呵笑道："王老爷难也有点勿老实哉！陆里去想得来好主意，说来哚城里。"小红道："瞒倒瞒得紧哚，连朋友哚寻仔好几埭也寻勿着。"阿珠道："王老爷，耐也老相好哉，耐就说仔要去做啥人也无啥啘，阿怕倪先生勿许耐嗄？"小红道："耐去做啥人也勿关倪事；耐定规要瞒仔倪了去做，倒好像是倪吃醋，勿许耐去，阿要气煞人！"莲生见他们一递一句，插不下嘴去，只看着讪笑。及至阿珠事毕下楼，莲生方向小红说道："耐覅去听啥别人个闲话。我搭耐也三四年哉，我个脾气，耐阿有啥勿晓得？我就是要去做啥人末，搭耐说明白仔再做末哉啘，瞒耐做啥？"小红道："我也勿晓得耐啘。耐自家去想想看，耐一直下来，东去叫个局，西去叫个局，我阿曾说歇啥一句闲话嗄？耐第歇倒要瞒我哉，故末为啥呢？"莲生道："我是无价事，勿是要瞒耐。"小红道："我到猜着耐个意思来里：耐也勿是要瞒我，耐是有心来哚要跳槽哉，阿是？我倒要看耐跳跳看！"莲生一听，沉下脸，别转头，冷笑道："我不过三日天勿曾来，耐就说是跳槽；从前我搭耐说个闲话，阿是耐忘记脱哉？"小红道："正要耐说啘。耐勿忘记末，耐说 ，三日天来哚陆里？做个啥人？耐说出来，我勿搭耐吵末哉。"莲生道："耐教我说啥 ？我说来里城里，耐勿信。"小红道："耐倒还要拨当水我上，我打听仔了再问耐。"莲生道："故末蛮好。第歇耐来哚气头浪，搭耐也无处去说；隔两日等耐快活仔点，我再搭耐说个明白末哉。"小红鼻子里哼了一声，半日不言语。莲生央告道："倪去吃筒烟去 。"小红仍拉着手，同至榻床前。莲生脱去马褂，躺下吸烟，小红却呆呆的坐在下手。莲生要想些闲话来说，又没甚说的。
忽听得楼梯上一阵脚声，跑进房来，却是大姐阿金大，一见莲生，说道："王老爷，我末到耐公馆里请耐，耐倒先来里哉。"又道："王老爷为啥几日勿来，阿是动气哉？"莲生不答。小红嗔道："动啥气嗄。打两记耳光哉 ，动气！"阿金大道："王老爷，耐勿来仔末，倪先生气得来，害倪一埭一埭来请耐。难覅实概，阿晓得！"说着，移过一碗茶来，放在烟盘里，随把马褂去挂在衣架上，要去。莲生见小红呆呆的，乃说道："倪去弄点点心来吃，阿好？"小红道："耐要吃啥，说末哉。"莲生道："耐也吃点，倪一淘吃；耐覅吃末，也覅去弄哉。"小红道："价末耐说 。"莲生想小红喜吃的是虾仁炒面，即说了。小红叫住阿金大，叫他喊下去，到聚丰园去叫。须臾送来，莲生要小红同吃。小红攒眉道："勿晓得为啥，厌酸得来，吃勿落。"莲生道："价末多少吃点。"小红没法，用小碟检几根来吃了，放下。莲生也吃不多几筷，即叫收下去。
阿珠绞手巾来，回说："耐管家打轿子来里。"莲生问："阿有啥事体？"阿珠望楼窗口叫："来二爷。"来安听唤，立即上楼见莲生，呈上一封请帖。莲生开看，是葛仲英当晚请至吴雪香家吃酒的，随手撩下。来安仍退下去了。
莲生仍去榻床吸烟，忽又想起一件事来，叫阿珠要马褂来着。阿珠便去衣架上取下，小红喝住道："倒要紧哚啘，耐想陆里去？"阿珠忙丢个眼色与小红，道："让俚吃酒去罢。"小红才不说了。适被莲生抬头看见，心想阿珠做什么鬼戏，难道张蕙贞的事被他们打听明白了不成。莲生一面想，一面阿珠把马褂替莲生披上，口里道："难末就来叫，覅去叫啥别人哉。"小红道："搭俚说啥嗄！俚要叫啥人，等俚去叫末哉啘。"莲生着好马褂，挽着小红的手，笑道："耐送送我 。"小红使劲的一撒手，反在靠壁高椅上坐下了。莲生也挨在身傍，轻轻说了好些知己话。小红低着头剔理指甲，只是不理，好一会，方说道："耐个心勿晓得那价生来哚，变得来！"莲生道："为啥说我变心？"小红道："问耐自家啘。"莲生还紧着要问，小红叉起两手把莲生推开道："去罢，去罢！看仔耐倒惹气。"莲生乃佯笑而去。
第四回终。
