按：金巧珍和金爱珍一路说话，缓缓同行。陈小云走的快，先自上车，阿海也在车旁等候。金爱珍直送出棋盘街，眼看阿海搀巧珍上车坐定，扬鞭开轮，始回。
小云见天色将晚，不及再游静安寺，说与巧珍，令车夫仍打黄浦滩兜个圈子转去罢。于是出五马路，进大马路，复转过四马路，然后至三马路同安里口，卸车归家。
小云在巧珍房里略坐一刻，正要回店，适值车夫拉了包车来接，呈上两张请帖：一张是庄荔甫催请的，下面加上两句道："善卿兄亦在坐，千万勿却是荷。"一张是王莲生请至沈小红家酒叙。小云想沈小红家断无不请善卿之理，不如先去应酬莲生这一局，好与善卿商定行止。遂叫车夫拉车到西荟芳里，自己却步行至沈小红家。只见房间里除王莲生主人之外，仅有两客，系莲生局里同事，即前夜张蕙贞台面带局来的醉汉。一位姓杨，号柳堂；一位姓吕，号杰臣。这两位与陈小云虽非至交，却也熟识，彼此拱手就坐。随后管家来安请客回来，禀道："各位老爷才说是就来。就是朱老爷陪杭州黎篆鸿黎大人来哚，说谢谢哉。"王莲生没甚吩咐，来安放下横披客目，退出下去。莲生便叫阿珠喊外场摆台面。陈小云取客目来一看，共有十余位，问道："阿是双台？"王莲生点点头。沈小红笑道："倪勿然陆里晓得啥双台嗄，难末学仔乖，倒摆起双台来哉。也算体面体面。"陈小云不禁笑了，再从头至尾看那客目中姓名，诧异得很，竟与前夜张蕙贞家请的客一个不减，一个不添。因问王莲生是何意，莲生但笑不言。杨柳堂、吕杰臣齐道："想来是小红先生意思，耐说阿对？"陈小云恍然始悟。沈小红笑道："耐哚瞎说！倪搭请朋友，只好拣几个知己点末请得来绷绷场面，比勿得别人家有面孔。就象朱老爷末，阿是看勿起倪勿来哉啘！。
说笑间，葛仲英、罗子富、汤啸庵先后到了，连陶云甫、陶玉甫昆仲接踵咸集。陈小云道："善卿为啥还勿来？只怕先到仔别场花去应酬哉 。"王莲生道："勿是，我碰着歇善卿，有一点小事体教俚去跑一埭，要来快哉。"说声未绝，楼下外场喊："洪老爷上来。"王莲生迎出房去呫唧了好一会，方进房。沈小红一见洪善卿，慌忙起身，满面堆笑说道："洪老爷，耐覅动气 。倪个闲话无拨啥轻重，说去看光景，有辰光得罪仔客人，客人动仔气，倪自家倒勿曾觉着。昨日夜头我说：'洪老爷为啥一歇要去哉嗄？'王老爷说我得罪哉。我说：'阿哟，我勿晓得啘！我为啥去得罪洪老爷啘？'今朝一早我就要教阿珠到周双珠搭来张耐，也是王老爷说：'晚歇去请洪老爷来末哉。'洪老爷，耐看王老爷面浪搭倪包荒点个 。"洪善卿呵呵笑道："我动啥气嗄？耐也无啥得罪我 ，耐覅去多花瞎小心。倪不过是朋友，就得罪仔点，到底勿要紧，只要耐勿得罪王老爷末才是哉。耐要得罪仔王老爷，倪就搭耐说句把好听闲话，也无用啘。"小红笑道："倪倒勿是要洪老爷搭倪说好话，也勿是怕洪老爷说倪啥邱话，为仔洪老爷是王老爷朋友末，倪得罪仔洪老爷，连搭倪王老爷也有点难为情，好象对勿住朋友哉啘。洪老爷阿是？"王莲生叉口剪住道："覅说哉，请坐罢。"大家一笑，齐出至当中间，入席让坐。陈小云乃问洪善卿道："庄荔甫请耐陆秀宝搭吃酒，耐阿去？"善卿愕然道："我勿晓得啘。"小云道："荔甫来请我，说耐也来哚。我想荔甫做陆秀林啘，陆秀宝搭阿是搭啥人代请嗄？"善卿道："我外甥赵朴斋末，陆秀宝搭吃过一台酒；今夜头勿晓得阿是俚连吃一台。"一时，台面上叫的局络绎而来，果然周双珠带一张聚秀堂陆秀宝处请帖与洪善卿看，竟是赵朴斋出名。善卿问陈小云："阿去？"小云道："我勿去哉，耐？"善卿道："我倒间架来里，也只好勿去。"说罢丢开。
罗子富见出局来了好几个，就要摆起庄来。王莲生向杨柳堂、吕杰臣道："耐哚喜欢闹酒，倪也有个子富来里，去闹末哉。"沈小红道："倪今朝倒忘记脱仔，勿曾去喊小堂名；喊仔一班小堂名来也要闹热点哚。"汤啸庵笑道："今年阿是二月里就交仔黄梅哉，为啥多花人嘴里向才酸得来？"洪善卿笑道："到仔黄梅天倒好哉，为仔青梅子比黄梅子酸得野哚。"说得客人、倌人哄堂大笑。王莲生要搭讪开去，即请杨柳堂、吕杰臣伸拳打罗子富的庄。当下开筵坐花，飞觞醉月，丝哀竹急，弁侧钗横，才把那油词醋意混过不提。
比及酒阑灯灺，众客兴辞，王莲生陆续送毕，单留下洪善卿一个请至房间里。善卿问有何事。莲生取出一大包首饰来，托善卿明日往景星银楼把这旧的贴换新的，就送去交张蕙贞收。善卿应诺，开包点数，揣在怀里。原来莲生故意要沈小红来看，小红偏做不看见，坐一会儿，索性楼下去了。不知这一去正中莲生的心坎。
莲生见房间里没人，取出一篇细帐交与善卿，悄悄嘱道："另外再有几样物事，耐就照仔帐浪去办，办得来一淘送去，覅拨小红晓得。"又嘱道："耐今夜头先到俚搭去一埭，问声俚看，还要啥物事，就添来哚帐浪末哉，覅忘记 。费神，费神！"善卿都应诺了，藏好那篇帐。恰好小红也回至楼上，莲生含笑问道："耐下头去做啥？"小红倒怔了一怔，道："倪勿做啥啘。耐问我做啥嗄，阿是倪下头有啥人来哚？"莲生笑道："我不过问问罢哉，耐啥多心得来。"小红正色道："我为仔坐来里，倘忙耐有啥闲话勿好搭洪老爷说，我走开点末，让耐哚去说哉啘。阿对嗄？"莲生拱手笑道："承情，承情！"小红也一笑而罢。
洪善卿料知没别的话，告辞要行。莲生送至楼梯，再三叮咛而别。善卿即往东合兴里张蕙贞处，径至楼上。张蕙贞迎进房间里。善卿坐下，把王莲生所托贴换另办一节彻底告诉蕙贞，然后问他："阿再要啥物事？"蕙贞道："物事倪倒勿要啥哉，不过帐浪一对嵌名字戒指要八钱重哚。"善卿令娘姨拿笔砚来，改注明白，仍自收起。蕙贞又说道："王老爷是再要好也无拨，就勿晓得沈小红搭倪前世有啥多花冤家对头。倪坍仔台末，耐沈小红阿有啥好处？"说着，就掩面而泣。善卿叹道："气 怪勿得耐气，想穿仔也无啥要紧。耐就吃仔点眼前亏，倪朋友哚说起，倒才说耐好。耐做下去，生意正要好哚。倒是沈小红外头名气自家做坏哉，就不过王老爷末原搭俚蛮好，除仔王老爷，阿有啥人说俚好嗄。"蕙贞道："王老爷说末说糊涂，心里也蛮明白哚。耐沈小红自家想想看，阿对得住王老爷？倪是也勿去说俚哚，只要王老爷一径搭沈小红要好落去，故末算是耐沈小红本事大哉。"善卿点头说："勿差。"随立起身来道："倪去哉。耐倒要保重点，覅气出啥病来。"蕙贞款步相送，笑着答道："倪自家想，犯勿着气煞耐沈小红哚手里。老仔面皮倒无啥气，蛮快活来里。"善卿道："故末蛮好。"一面说，一面走。出四马路看时，灯光渐稀；车声渐静，约摸有一点多钟，不如投宿周双珠家为便；重又转身向北，至公阳里，不料各家玻璃灯尽已吹灭，弄内黑魆魆的，摸至门口，惟门缝里微微射出些火光。善卿推进门去，直到周双珠房里，只见双珠倚窗而坐，正摆弄一副牙牌在那里"斩五关"，双玉站在桌旁观局。善卿自向高椅坐了，双珠象没有理会，猝然问道："台面散仔一歇哉啘，耐来哚陆里嗄？"善卿道："就张蕙贞搭去仔一埭。"因说起王莲生与张蕙贞情形，笑述一遍，将首饰包放在桌上。双珠道："我只道耐转去哉，阿金哚等仔歇也才去哉。"善卿道："俚哚去仔末，我来伺候耐。"双珠道："耐阿吃稀饭嗄？"善卿道："覅吃。"双珠的五关终斩他不通，随手丢下，走过这边打开首饰包看了，便开橱替善卿暂行庋置。双玉就坐在双珠坐的椅上，掳拢牙牌，也接着去打五关。忽又听得楼下推门声响，一个小孩子声音问："倪无娒 ？"客堂里外场答道："耐哚无娒转去哉啘。"双珠听了，急靠楼窗口叫："阿大，耐上来 。"那孩子飞跑上楼。善卿认得是阿德保的儿子，名唤阿大，年方十三岁，两只骨碌碌眼睛，满房间转个不住。双珠告诉他道："耐无娒末，我教俚乔公馆里看个客人去，要一歇转来哚。耐等歇未哉。"阿大答应，却站在桌傍看双玉斩五关。双玉虽不言语，却登时沉下脸来，将牙牌搅得历乱，取盒子装好，自往对过自己房里去了。善卿道："双玉来仔几日天，阿曾搭耐哚说歇几声闲话？"双珠笑道："原是啘。倪无娒也说仔几埭哉，问一声末说一句，一日到夜坐来哚，一点点声音也无拨。"善卿道："人阿聪明嗄？"双珠道："人是倒蛮聪明，俚看见我打五关，看仔两埭，俚也会打哉。难看俚做起生意来，勿晓得阿会做。"善卿道："我看俚勿声勿响，倒蛮有意思，做起生意来比仔双宝总好点。"双珠道："双宝是覅去说俚哉！自家无拨本事末倒要说别人，应该耐说个辰光倒勿响哉。"这里善卿、双珠正说些闲话，那阿大趔趄着脚儿，乘个眼错，溜出外间，跑下楼去。双珠一回头，早不见了。双珠因发怒，一片声喊"阿大"，阿大复应声而至。双珠沉下脸喝道："啥多花要紧嗄，等耐无娒来一淘去！"阿大不敢违拗，但羞得遮遮掩掩，没处藏躲，幸而阿金也就回来。双珠叫道："耐哚倪子等仔一歇哉，快点转去罢。"阿金上楼，向双珠耳朵边不知问什么话，双珠只做手势告诉阿金。阿金方辞善卿，领阿大同回。善卿笑道："耐哚鬼戏装得来阿像嗄，只好骗骗小干仵！要阿德保来上耐哚当水，勿见得 。"双珠道："到底骗骗末也骗仔过去，勿然转去要反杀哉！"善卿道："乔公馆去看啥客人？客人末来哚朱公馆，只怕俚到朱公馆去看仔一埭。"双珠嗤的笑道："耐也算做仔点好事罢，覅去说俚哉。"善卿付之一笑。良宵易度，好梦难传，表过不叙。
到十八日，洪善卿吃过中饭，就要去了结王莲生的公案，周双珠将橱中首饰包仍交善卿。于是善卿别了双珠，踅出公阳里，经由四马路，迎面遇见汤啸庵，拱手为礼。啸庵问善卿："陆里去？"善卿略说大概，还问啸庵："啥事体？"啸庵道："也搭耐差勿多，我是替罗子富开消蒋月琴哚局帐去。"善卿笑道："倪两家头赛做过俚哚和事老，倒也好笑得极哉！"啸庵大笑，分路而去。善卿自往景星银楼，掌柜的招呼进内，先把那包首饰秤准分两，再拣取应用各件，**俱全。惟有一对戒指，一只要"双喜双寿"花样，这也有现成的，一只要方空中嵌上"蕙贞张氏"四字，须是定打，约期来取。只得先取现成一只和拣定的各件装上纸盒，包札停当。善卿仍用手巾兜缚绾结，等掌柜的核算。扣除贴换之外还该若干，开明**，请善卿过目。善卿不及细看，与王莲生那篇帐一并收藏，当即提了手巾包儿，退出景星银楼门首。心想天色尚早，且去那里勾留小坐，再送至张蕙贞处不迟。正打算那里去好，只见赵朴斋独自一个从北首跑下来，两只眼只顾往下看，两只脚只顾往前奔，擦过善卿身旁，竟自不觉。善卿猛叫一声："朴斋！"朴斋见是娘舅，慌忙上前厮唤，并肩站在白墙根前说话。
善卿问："张小村呢？"朴斋道："小村搭吴松桥两家头勿晓得做啥，日逐一淘来哚。"善卿道："陆秀宝搭，耐为啥连浪去吃酒？"朴斋嗫嚅半晌，答道："是拨来庄荔甫哚说起来，好象难为情，倒应酬俚连吃仔一台。"善卿冷笑道："单是吃台把酒，也无啥要紧，耐是去上仔俚哚当水哉，阿是？"朴斋顿住嘴说不出，只模糊搪塞道："故也无啥上当水。"善卿笑道："耐瞒我做啥 ？我也勿来说耐，到底耐自家要有点主意末好。"朴斋连声诺诺，不敢再说。善卿问："故歇一干仔陆里去？"朴斋又没得回答。善卿又笑道："就是去打茶会末阿有啥勿好说嗄？我搭耐一淘去末哉。"原来善卿独恐朴斋被陆秀宝迷住，要去看看情形如何。
朴斋只好跟善卿同望南行。善卿慢慢说道："上海夷场浪来一埭，白相相，用脱两块洋钱也无啥。不过耐勿是白相个辰光，耐要有仔生意，自家赚得来，用脱点倒罢哉；耐故歇生意也无拨，就屋里带出来几块洋钱，用拨堂子里也用勿得啥好。倘忙耐洋钱末用光哉，原无拨啥生意，耐转去阿好交代？连搭我也对勿住耐哚老堂哉啘。"朴斋悚然敬听，不则一声。善卿道："我看起来，上海场花要寻点生意也难得势哚。耐住来哚客栈里，开消也省勿来，一日日哝下去，终究勿是道理。耐白相末也算白相仔几日天哉，勿如转去罢。我搭耐留心来里，要有仔啥生意，我写封信来喊耐好哉。耐说阿是？"朴斋那里敢说半个不字，一味应承，也说是"转去好"。甥舅两个口里说，脚下已踅到西棋盘街聚秀堂前。善卿且把闲话撩过一边，同朴斋进门上楼。
第十二回终。
