按：周双玉踅进对过自己房里，巧囡跟过来问双玉道："出局衣裳，无娒阿曾拨来耐？"双玉摇摇头。巧囡道："我去搭耐问声看。耐拿鬓脚来刷刷 。"说了，忙下楼去问老鸨周兰。
双玉自把保险台灯移置梳妆台上，且不去刷鬓脚，就在床沿坐下，悄悄的侧耳而听。原来周双玉房间底下乃是老鸨周兰自己卧室，那周双宝搬下去铺的房间却在周双珠的房间底下。当时听得老鸨周兰叫巧囡掌起灯来，开橱启箱，翻腾一会，又呫呫唧唧说了许多闲话，然后出房，却又往双宝房背后去，不知做甚么，一些也听不见。双玉方才丢开，起身对镜，照见两边鬓脚稍微松了些，随取抿子轻轻刷了几刷，已自熨贴。只见巧囡怀里抱着衣裳，同周兰上楼来了。双玉收过抿子，便要取衣裳来穿。周兰道："慢点 。耐个头勿好啘，啥毛得来。"乃将手中揣着的豆蔻盒子放下，亲自动手替双玉弄头。捏了又捏，揿了又揿，浓浓的蘸透了一抿子刨花浸的水，顺着螺丝旋刷进去，又刷过周围刘海头。刷的那水从头颈里直流下去，连前面额角上也亮晶晶都是水渍。双玉伸手去拭，周兰忙阻止道："耐覅动 。"遂用手巾在头颈里略掩一掩，叫双玉转过脸来，仔细端详一回说："好哉。"巧囡在傍提着衣裳领口，伏侍双玉穿将起来，是一件织金撇兰盆景一色镶滚湖色宁绸棉袄。巧囡看了道："实概件衣裳，我好象勿曾看见歇。"周兰道："耐末陆里看得见，说起来还是大先生个哉。俚哚姊妹三家头，才有点怪脾气，随便啥衣裳哉，头面哉，才要自家撑得起来，别人个物事，就拨来俚俚也勿要。双珠个头面末，也勿算少，单说衣裳，是陆里及得来阿大搭阿二嗄，比仔双珠要多几花哚。俚哚嫁出去辰光，拣中意点末拿仔去，剩下来也有几箱子，我收捉仔起来，一直用勿着，还有啥人来着 ？就拨来双宝着过歇，也勿多几件。还有几几花花，连搭双宝也勿曾看见歇，覅说啥耐哉。"双玉穿上棉袄，向大洋镜前走了几步，托起臂膊，比比出手。周兰过去把衣襟绉纹拉直些，又唠叨说道："耐要自家有志气，做生意未巴结点，阿晓得？我眼睛里望出来，无啥亲生勿亲生，才是我囡仵。耐倘然学得到双珠阿姐末，大先生、二先生几花衣裳头面，随便耐中意陆里一样，只管拿得去末哉。要象仔双宝样子，就算是我亲生囡仵，我也勿高兴拨俚啘。"双玉只听着不言语。周兰问他："阿听见？"双玉说："听见哉。"周兰道："价末耐也答应声 ，啥一声也勿响嗄？"巧囡听台面上叫的局先已到了，急取豆蔻盒子，连声催促，方剪住周兰的话头，搀了双玉，往前便走，却忽然想起银水烟筒来。巧囡道："就三先生搭拿仔根罢。"周兰道："勿要；耐到双宝搭去拿得来。双宝一根末让俚用仔，我再拿一根出来拨来双宝。"巧囡赶着跑去。周兰又教导些台面规矩与双玉听，并说："耐勿晓得末，问阿姐好哉。阿姐搭耐说啥闲话，耐听好仔，覅忘记。耐要是勿肯听人闲话，我先搭耐说一声，耐自家吃苦，到底无啥好处。"周兰说一句，双玉应一声。
须臾，巧囡取银水烟筒回来，周兰自下楼去。巧囡忙挈双玉至这边台面上。只见先到的只有一个局，乃是陈小云的相好金巧珍，住在同安里口，只隔一条三马路，走过来就是，所以早些。当时金巧珍拉开嗓子唱京调，引得罗子富兴高采烈，摆庄豁拳。更有赵朴斋、张小村刻意奉承，极力鼓舞，此外诸位也就随和着。独有王莲生没精打采，坐也坐不住。周双珠知道是厌烦，问他："阿到对过去坐歇？"莲生正中胸怀，即时离席。巧囡领着踅过周双玉房间，点了烟灯，冲了茶碗，向莲生道："我去喊双玉来。"莲生阻挡不及，只好听他喊去。只见周双玉冉冉归房，脱换衣裳，远远的端坐相陪，嘿然无语，莲生自然不去兜搭。一会儿，巧囡又跑来张罗，叮嘱双玉陪着，也就去了。莲生吸了两口烟，听那边台面上豁拳唱曲，热闹得不耐烦，倒是双玉还静静的坐在那里低头敛足弄手帕子。莲生心有所感，不觉暗暗赞叹了一番。
忽听得娘姨阿金走出当中间，高声喊"绞手巾"。一时，履声，舄声，帘钩声，客辞主人声，主人送客声，杂沓并作，却不知去的是谁，只觉得台面上冷静了许多。随后汤啸庵也踱过这过房里来，吃得绯红的脸，一手拿着柳条剔牙杖剔牙，随意向榻床下首歪着，看莲生烧烟。莲生问："子富去哉？"啸庵道："俚哚还有啥局头，搭仲英、小云一淘去哉。"莲生遂约啸庵同洪善卿到沈小红家去，啸庵会意应诺。及巧囡来请用饭，两人方过那边归席入座。汤啸庵向洪善卿耳边说了几句，善卿听了微笑。周双珠也点头笑道："耐哚说啥，我也懂来里哉。"啸庵道："耐说说看。"双珠把嘴望莲生一努。大家笑着，都吃过饭。张小村知道他们有事，和赵朴斋告辞先行。王莲生道："倪也去罢。"汤啸庵、洪善卿说"好"。周双珠忙喊双玉过来，送至楼门而回。
三人缓步同行。来安叫轿夫抬空轿子跟随在后，出了公阳里，就对门进同安里，穿至西荟芳里口，适被娘姨阿珠的儿子暗中瞧见，跑去报信。阿珠迎出门首，笑嘻嘻说道："我说王老爷要来快哉，倒刚刚来哉。"当下王莲生在前，与汤啸庵、洪善卿进门，后面跟着阿珠，接踵上楼，早听得房间里小脚高底一阵怪响。王莲生方跨进当中间房门，只见沈小红越发蓬头垢面，如鬼怪一般，飞也似赶出当中间，望莲生纵身直扑上去，莲生错愕倒退。大姐阿金大随后追到，两手合抱拢来，扳住小红胸脯，只喊说："先生覅 ！"慌的阿珠抢上去叉住小红臂膊，也喊说："先生耐慢点看！"小红咬牙切齿，恨道："耐哚走开点 ！我要死末关耐哚啥事嗄？"阿珠连连劝道："耐就要死末，也勿实概个啘；故歇王老爷来仔，也好等王老爷说起来，说勿好耐再去死末哉啘。"小红一心和莲生拚命，那里肯依。汤啸庵、洪善卿见如此撒泼，不好说甚，只是冷笑。莲生又羞又恼，又怕又急，四下里一逼，倒逼出些火性来，也冷笑说道："让俚去死末哉！"说了一句，回身便走。汤啸庵、洪善卿只得跟着走了。阿珠见光景不好，也顾不得小红，赶紧来拉莲生；被莲生一豁，洒脱袖子，竟下楼梯。忽听得当中间板壁蓬咚蓬咚震天价响起来，阿金大在内极声喊道："勿好哉，先生撞煞哉呀！"就这一声喊里，唤起楼下三四个外场，只道有甚祸事，急急跑上楼来，适与莲生等挤住在楼梯上。阿珠把莲生死拖活拽，往里挣去。汤啸庵、洪善卿料道走不脱，也撺掇莲生回至当中间。只见小红还把头狠命往板壁上磕，阿金大扳住胸脯，那里扳得开。阿珠着了忙，也狠命的拦腰一抱抱起来。汤啸庵、洪善卿齐说道："小红耐算啥 ？有闲话说末哉，实概样子，耐小红也犯勿着啘。"阿珠摸摸小红的头，没甚伤损，只有额角边被板壁上钉的钉头碰破些油皮，也不至流血。阿金大上前把手心摩挲着道："耐看阿险嗄！撞来哚太阳里末，那价呢？"莲生正站在一傍发呆。阿珠一眼睃见，说道："王老爷，闯出穷祸来耐也脱勿了个 ，覅看仔象无要紧。"外场见没事，都笑道："倒吓得倪来要死！快点搀先生房间里去罢。"阿珠仍抱起小红来。阿金大拉了莲生，汤啸庵、洪善卿一同簇拥至房里。阿珠放小红向榻床躺下。阿金大端整茶碗，叫外场冲了茶。外场嘱付阿珠说："耐哚小心点末哉。"都讪笑着下楼去了。
王莲生、汤啸庵、洪善卿一溜儿坐在靠壁高椅上。小红背灯向壁，掩面而哭。阿珠靠小红身傍坐着，慢慢与王莲生说道："王老爷，耐自家勿好，转差仔念头。耐起初要搭倪先生说明白仔，耐就去做仔十个张蕙贞，倪先生也无啥啘，为仔耐瞒仔倪先生末倒勿好哉。倪先生晓得耐去做仔张蕙贞，说难是王老爷倪搭勿来个哉，拨来张蕙贞哚拉仔去哉。"洪善卿不待说完，即拦说道："王老爷不过昨日夜头来哚张蕙贞搭吃仔台酒，故歇原到该搭来哉啘。"阿珠立起身来，走过洪善卿身傍，轻声说道："洪老爷，耐是蛮明白来里。倪先生倒覅怪俚，俚是发极仔了呀。王老爷先起头做倪先生辰光，还有好几户老客人哚。后来搭王老爷要好仔末，有个把客人阿要动气勿来哉了，倪末去请哉啘，王老爷就搭倪先生说：'俚哚勿来，让俚哚勿来末哉，我一干仔来搭耐撑场面。'王老爷，阿是耐说来哚个闲话？先生有仔王老爷，倒蛮放心，请也勿去请哉。难末一户一户客人才勿来哉，到故歇是无拨哉，就剩仔王老爷一干仔哉。洪老爷，耐说王老爷去做仔张蕙贞，倪先生阿要发极？"汤啸庵接说道："难也覅去说哉。张蕙贞哚末坍仔台哉，王老爷原到该搭来，耐沈小红场面也可以过得去哉。大家覅说哉，阿是？"小红正哭得涕泪交颐，听啸庵说，便分说道："汤老爷，耐问声俚看。俚自家搭我说，教我生意覅做哉，条子末 脱仔。我听仔俚，客人叫局也勿去。俚还搭我说，俚说：'耐少来哚几花债末，我来搭耐还末哉。'我听仔快活煞，张开仔两只眼睛单望俚一干仔，望俚搭我还清仔债末，我也有仔好日脚哉，陆里晓得俚一直来里骗我！骗到我今日之下，索性豁脱仔，去包仔个张蕙贞哩！"说到这里，两脚一跺，身子一掀，俯仰号啕，放声大哭。哭了又道："俚就要去做张蕙贞，也无啥！我自家想想，衣裳末着完哉，头面末当脱哉，客人末一个也无拨哉，倒欠仔一身债。弄得我上勿上，落勿落，难末教我那价 ？"汤啸庵微笑道："故也无啥那价。王老爷原来里，衣裳头面原教王老爷办得来，债末教王老爷去还清仔，阿是才舒齐哉啘？"小红道："汤老爷，勿瞒耐说，王老爷来里该搭做仔两年半，买来哚几花物事才来里眼睛前头。张蕙贞搭勿到十日天，从头浪起到脚浪，陆里一样勿搭俚办起来？还有朋友哚拍马屁，鬼讨好，连忙搭俚买好仔家生送得去铺房间。耐汤老爷陆里晓得 ！"洪善卿插说道："王老爷也叫瞎说！堂子里做个把倌人，只要局帐清爽仔末是哉。倌人欠来哚债，关客人啥事，要客人来搭俚还。老实说，倌人末勿是靠一个客人，客人也勿是做一个倌人；高兴多走走，勿高兴就少走走，无啥多花枝枝节节啘！"小红正要回嘴，阿珠赶着戗说道："洪老爷说得勿差，'倌人末勿是靠一个客人。'倪先生也有好几户客人哚，为啥要耐王老爷一干仔来撑场面 ？耐就一干仔撑仔场面，勿来搭倪先生还债，倪先生就欠仔一万债，阿好搭耐王老爷说，要耐王老爷来还嗄？耐王老爷自家搭倪先生说，要搭倪先生还债。只要王老爷真真还清仔，倪先生阿有啥枝枝节节？耐就去做仔张蕙贞，'客人也勿是做一个倌人'，倪先生阿好说耐啥？故歇耐王老爷原勿曾搭倪先生还歇一点点债，倒先去做仔张蕙贞哉。耐王老爷想想看，阿是倪先生来里枝枝节节呢？阿是耐王老爷自家来哚枝枝节节？"说罢，眱了王莲生半日。
莲生仰着脸，只不做声。洪善卿笑道："俚哚啥枝枝节节也勿关倪事，倪要去哉。"遂与汤啸庵立起身来。莲生意思要一同去，小红只做不看见，倒是阿金大捺住莲生道："咦！王老爷，耐阿好去嗄？"阿珠喝阿金大放手，却向莲生道："王老爷耐要去，去末哉；倪是勿好来屈留耐，就搭耐说一声是哉。昨日夜头我搭阿金大两家头陪倪先生坐来哚床浪，坐仔一夜天勿曾困，今夜头倪要困去哉。倪娘姨哚到底无啥干己，就闯仔点穷祸，也勿关倪事。倪先说仔末，王老爷也怪勿着倪。"几句说得莲生左右为难，不得主意。汤啸庵向莲生道："倪先去，耐坐歇罢。"莲生乃附耳嘱他去张蕙贞家给个信。啸庵应诺，始与洪善卿偕行。小红却也抬身送了两步，说道："倒难为仔耐哚，明朝倪也摆个双台谢谢耐哚末哉。"说着，倒自己笑了。莲生也忍不住要笑。
小红转身，伸一个指头向莲生脸上连点几点，道："耐末......"只说得两字，便缩住了，却哼的一声，象是叹气，半晌又道："耐一干仔来末，阿怕倪欺瞒仔耐嗄？耐算教两个朋友来做帮手，帮仔耐说闲话，阿要气煞人！"莲生自觉羞惭，佯作不睬。阿珠冷笑两声，道："王老爷倒蛮好，才是朋友哚搭俚出个主意，王老爷末去听仔俚。就张蕙贞搭，勿是朋友同得去，陆里认得嗄？"小红道："张蕙贞搭倒勿是朋友，俚乃自家去打个野鸡。"阿珠道："故歇是勿是野鸡哉，也算仔长三哉！叫仔一班小堂名，显焕得来！王老爷做仔几日天，用脱仔几花？阿有千把嗄？"莲生道："耐哚覅瞎说。"阿珠道："倒勿是瞎说 。"随将烟盘收拾干净道："王老爷吃烟罢，覅去转啥念头哉。"莲生乃去榻床躺下吸烟，阿珠、阿金大陆续下去。
第十回终。
