按：罗子富正要朱蔼人摆庄，忽听得黄二姐低声叫"罗老爷"。子富不及豁拳，丢下便走。黄二姐在外间迎着，道："阿要金凤来替耐豁两拳？"子富点点头，黄二姐遂进房到台面上去。子富自过对过房间里，只见黄翠凤独自一个坐在桌子傍边高椅上，面前放着那一对金钏臂。翠凤见子富近前，笑说："来 。"揣住子富的手捺到榻床坐下，说道："倪无娒上耐当水，听仔耐闲话，快活得来。我就晓得耐是不过说说罢哉。耐有蒋月琴来哚，陆里肯来照应倪？倪无娒还拿仔钏臂来拨我看。我说：'钏臂末啥稀奇，蒋月琴哚勿晓得送仔几花哉！就是倪也有两副来里，才放来哚用勿着，要得来做啥？'耐原拿仔转去罢。隔两日耐真个蒋月琴搭勿去仔，想着要来照应倪，再送拨我正好。"子富听了，如一瓢冷水兜头浇下，随即分辨道："我说过蒋月琴搭定规勿去哉。耐勿相信末，我明朝就教朋友去搭我开消局帐，阿好？"翠凤道："耐开消仔，原好去个啘。耐搭蒋月琴是老相好，做仔四五年哉，俚哚也蛮要好；耐故歇末说勿去哉，耐要去起来，我阿好勿许耐去？"子富道："说仔勿去，阿好再去嗄？说闲话勿是放屁。"翠凤道："随便耐去说啥，我勿相信啘。耐自家去想 ，耐末就说是勿去，俚哚阿要到耐公馆里来请耐嗄？俚要问耐，阿有啥得罪仔耐了动气，耐搭俚说啥？阿好意思说倪教耐覅去嗄。"子富道："俚请我，我勿去，俚阿有啥法子？"翠凤道："耐倒说得写意哚，耐勿去，俚哚就罢哉。俚定归要拉耐去，耐阿有啥法子？"子富自己筹度一回，乃问道："价末耐说要我那价 ？"翠凤道："我说，耐要好末，要耐到倪搭来住两个月，耐勿许一干仔出门口。耐要到陆里，我搭耐一淘去，蒋月琴哚也勿好到倪搭来请耐。耐说阿好？"子富道："我有几花公事哚，陆里能够勿出门口。"翠凤道："勿然末，耐去拿个凭据来拨我。我拿仔耐凭据，也勿怕耐到蒋月琴搭去哉。"子富道："故阿好写啥凭据嗄？"翠凤道："写来哚赁据，阿有啥用场！耐要拿几样要紧物事来放来里，故末好算凭据。"子富道："要紧物事，不过是洋钱啘。"翠凤冷笑道："耐看出倪来啥邱得来！阿是倪要想头耐洋钱嗄？耐末拿洋钱算好物事，倪倒无啥要紧。"子富道："价末啥物事 ？"翠凤道："耐覅猜仔倪要耐啥物事，倪也为耐算计，不过拿耐物事来放来里，倘忙耐要到蒋月琴搭去末，想着有物事来哚我手里，耐勿敢去哉，也好死仔耐一条心。耐想阿是？"子富忽然想起，道："有来里哉，坎坎拿得来个拜匣，倒是要紧物事。"翠凤道："就是拜匣蛮好，耐放来里仔阿放心？我先搭耐说一声，耐到蒋月琴搭去仔一埭，我要拿出耐拜匣里物事来，一把火烧光个 。"子富吐舌摇头道："阿唷，利害哚！"翠凤笑道："耐说我利害，耐也识差仔人哉。我做末做仔个倌人，要拿洋钱来买我倒买勿动 。覅说啥耐一对钏臂哉，就摆好仔十对钏臂也勿来里我眼睛里。耐个钏臂，耐原拿得去。耐要送拨我，随便陆里一日送末哉。今夜头倒覅拨来耐看轻仔，好像是倪看中仔耐钏臂。"一面说，一面向桌上取那一对金钏臂，亲自替子富套在手上。子富不好再强，只得依他，道："价末原放来哚拜匣里，隔两日再送拨耐也无啥。不过拜匣里有几张栈单庄票，有辰光要用着末，那价？"翠凤道："耐用着末，拿得去末哉。就勿是栈单庄票，倘忙有用着个辰光，耐也好来拿个啘。到底原是耐个物事，阿怕倪吃没仔了？"子富复沉吟一回，道："我要问耐，耐为啥钏臂是勿要 ？"翠凤笑道："耐陆里猜得着我意思。耐要晓得做仔我，耐覅看重来哚洋钱浪。我要用着洋钱个辰光，就要仔耐一千八百，也算勿得啥多；我用勿着，就一厘一毫也勿来搭耐要。耐要送物事，送仔我钏臂，我不过见个情；耐就去拿仔一块砖头来送拨我，我倒也见耐个情。耐摸着仔我脾气末好哉。"子富听到这里，不禁大惊失色，站起身来道："耐个人倒稀奇哚！"遂向翠凤深深作揖下去道："我今朝真真佩服仔耐哉。"翠凤忙低声喝住，笑道："耐阿怕难为情嗄？拨俚哚来看见仔，算啥？"说着，仍揣住子富的手说："倪对过去罢。"挈至房门口，即推子富先行，翠凤随后，同向台面上来。
那时出局已散。黄二姐正帮着金凤等张罗，望见子富，报说："罗老爷来哉。"朱蔼人道："倪要吃稀饭哉，耐坎坎来。"子富道："再豁两拳。"陶云甫道："耐末倒有趣去，倪搭蔼人吃仔几花酒哚。"子富带笑而告失陪之罪，随叫拿稀饭来。席间如何吃得下，不过意思而已。当时席散，各自兴辞。子富送至楼梯边，见汤啸庵在后，因想着说道："我有点小事体，托耐去办办。明朝碰头仔再搭耐说。"啸庵应诺。等到陶云甫、朱蔼人轿子出门，然后汤啸庵步行而归。罗子富回到房间里，外场已撤去台面，赵家娒把笤帚略扫几帚，和小阿宝收拾了茶碗出去。子富随意闲坐，看翠凤卸头面。
须臾，黄二姐复进房与子富闲谈。翠凤便令取出那只拜匣来，交与子富。子富乃褪下钏臂，放在拜匣里。黄二姐不解何故，两只眼汩油油的，看看子富，看看翠凤。翠凤也不理他，子富照旧锁好。翠凤又令黄二姐将拜匣去放在后面官箱里，黄二姐才自明白，捧了拜匣要走，却回头问子富道："耐轿子阿教俚哚打转去？"子富道："耐去喊高升来。"黄二姐乃去喊了高升上楼。子富吩咐些说话，叫高升随轿子回公馆去了。随后小阿宝来请翠凤对过房间里去。翠凤将行，见房里只剩子富一个，即问："珠凤呢？"小阿宝道："无娒教俚哚困去哉。"翠凤看挂钟，已敲过四点，方不言语，便向楼窗口高声喊道："耐哚人才到仔陆里去哉！"赵家娒在楼下，连忙接应，一径来见子富，问道："罗老爷，安置罢？"子富点点头。于是赵家娒铺床吹灯，掩门退出。子富直等到翠凤归房安睡。一宿无话。
子富醒来，见红日满窗，天色尚早，小阿宝正拿抹布揩拭橱箱桌椅，也不知翠凤那里去了。听得当中间声响，大约在窗下早妆。再要睡时，却睡不着。一会儿，翠凤梳好头，进房开橱脱换衣裳。子富遂坐起来，着衣下床。翠凤道："再困歇 ，十点钟还勿曾到哩。"子富道："耐起来仔啥辰光哉？"翠凤笑道："我困勿着哉呀，七点多钟就起来哉。耐正来哚 头里。"赵家娒听见子富起身，伺候洗脸刷牙漱口，随问点心。子富说："勿想吃。"翠凤道："停歇吃饭罢。"赵家娒道："中饭还有歇哩 。"子富道："等歇正好。"翠凤道："教俚哚赶紧点。"赵家娒承命去说。子富复叫住问："高升阿曾来？"赵家娒道："来仔歇哉，我去喊得来。"高升闻唤，见了子富，呈上字条一张，洋钱一卷，问："阿要打轿子？"子富道："今朝礼拜，无啥事体，轿子勿要哉。"因转问翠凤："倪去坐马车阿好？"翠凤道："好个，倪要坐两把车哚。"子富也不则声，再看那张条子，乃是当晚洪善卿请至周双珠家吃酒的，即随手撩下。高升见没甚吩咐，亦遂退去。子富忽然记起一件事来，向翠凤道："我记得旧年夏天，看见耐搭个长条子客人夜头来哚明园，我勿晓得耐名字叫啥，晓得仔名字，旧年就要来叫耐局哉。"翠凤脸上一呆，答道："倪勿然搭客人一淘坐马车也无啥要紧，就为仔正月里有个广东客人要去坐马车，我勿高兴搭俚坐，我说：'倪要坐两把车哚。'就说仔一句，也勿曾说啥。耐晓得俚那价？俚说：'耐勿搭客人坐也罢哉；只要我看见耐搭客人一淘坐仔马车末，我来问声耐看。故末叫勿入味哚。'"子富道："耐搭俚说啥？"翠凤道："我啊？我说：'倪马车一个月难得坐转把，今朝为是耐第一埭教得去，我答应仔耐，耐倒说起闲话来哉。我勿去哉，耐请罢。'"子富道："俚下勿落台哉啘？"翠凤道："俚末只好搭我看看哉。"子富道："怪勿得耐无娒也说耐有点脾气哚。"翠凤道："广东客人野头野脑，老实说，勿高兴做俚，巴结俚做啥。"说话之间，不觉到了十二点钟。只见赵家娒端着大盘，小阿宝提着酒壶进房，放在靠窗大理石方桌上，安排两副杯箸，请子富用酒。翠凤亲自筛了一鸡缸杯，奉与子富，自己另取小银杯，对坐相陪。黄二姐也来见子富，帮着让菜，说道："耐吃倪自家烧来哚菜水，阿好？"子富道："自家烧，倒比厨子好。"黄二姐道："倪有厨子。"随指一碗小火方，一碗清蒸鸭掌，说："是昨日台面浪个菜。"翠凤向黄二姐道："耐也来吃仔口罢。"黄二姐道："勿要，我下头去吃。我去喊金凤来陪陪耐哚。"子富道："慢点去。"遂取那一卷洋钱交与黄二姐，开消下脚等项。黄二姐接了道："谢谢耐。"子富问他："谢啥？"黄二姐笑道："我先替俚哚谢谢，倒谢差哉。"一路说笑，自去分派。
子富因没人在房里，装做三分酒意，走过翠凤这边，兜兜搭搭。翠凤推开道："快点，赵家娒来哉。"子富回头，不见一人，索性爬到翠凤身上去不依道："耐倒骗我！赵家娒搭俚家主公也来哚有趣，阿有啥工夫来看倪。"翠凤恨得咬牙切齿。幸而金凤进来，子富略一松手，翠凤趁势狠命一推，几乎把子富打跌。金凤拍手笑道："姐夫做啥搭我磕个头？"子富转身，抱住金凤要亲嘴。金凤极声的喊说："覅噪 ！"翠凤两脚一跺道："耐啥噪勿清爽！"子富连忙放手说："勿噪哉，勿噪哉！先生覅动气。"当向翠凤作了个半揖。引得翠凤也嗤的笑了。金凤推子富坐下道："请用酒 。"即取酒壶，要给子富筛酒，再也筛不出来，揭盖看时，笑道："无拨哉。"乃喊小阿宝拿壶酒来。翠凤道："覅拨俚吃哉，吃醉仔末再搭倪瞎噪。"子富拱手央告道："再吃三杯，勿噪末哉。"及至小阿宝提了一壶酒来，子富伸手要接，却被翠凤先抢过去道："勿许耐吃哉。"子富只是苦苦央告。小阿宝在傍笑道："无拨吃哉，快点哭 。"子富真个哀哀的装出哭声。金凤道："拨俚吃仔点末哉，我来筛。"从翠凤手里接过酒壶来，约七分满筛了一杯。子富合掌拜道："谢谢耐，搭我筛满仔阿好？"翠凤不禁笑道："耐啥实概厚皮嗄。"子富道："我说吃三杯，再要吃末勿是人，耐阿相信？"翠凤别转脸不理。小阿宝、金凤都笑得打跌。
子富吃到第三杯，正值黄二姐端了饭盂上楼，叫小阿宝："下头吃饭去，我来替耐。"子富心知黄二姐已是吃过饭了，便说："倪也吃饭哉。"黄二姐道："再用一杯 。"子富听了，直跳起来，指定翠凤嚷道："耐阿听见无娒教我吃？耐阿敢勿拨我吃？"翠凤着实瞅了一眼道："越说耐倒越高兴哉！"竟将酒壶授与小阿宝带下楼去，便叫盛饭。黄二姐盛上三碗饭来，金凤自取一双象牙箸同坐陪吃。一时，赵家娒、小阿宝齐来伺候。吃毕收拾，大家散坐吃茶。珠凤也扭扭捏捏的走来，要给子富装水烟。子富取来自吃。
将近三点钟时分，子富方叫小阿宝令外场去喊两把马车。赵家娒舀上面水，请翠凤捕面。翠凤教金凤去打扮了一淘去，金凤应诺，同小阿宝到对过房里，也去捕起面来。翠凤只淡淡施了些脂粉，越觉得天然风致，顾盼非凡。妆毕，自往床背后去。赵家娒收过妆具，向橱内取一套衣裳，放在床上，随手带出银水烟筒，又自己忙着去脱换衣裳。金凤先已停当，过来等候。子富见他穿着银红小袖袄，蜜绿散脚裤，外面罩一件宝蓝缎心天青缎滚满身洒绣的马甲，并梳着两角丫髻，垂着两股流苏，宛然是《四郎探母》这一出戏内的耶律公主。因向他笑道："耐脚也覅去缠哉，索性扮个满洲人，倒无啥。"金凤道："故是好煞哉，只好拨来人家做大姐哉。"子富道："拨来人家末，做奶奶，做太太，阿有啥做大姐个嗄？"金凤道："搭耐说说末，就无清头哉。"翠凤听得，一面系裤带出来洗手，一面笑问子富道："拨耐做姨太太阿好？"子富道："覅说是姨太太，就做大太太末，也蛮好啘。"复笑问金凤道："耐阿情愿？"羞得金凤掩着脸伏在桌上，问了几声不答应。子富弯下身子悄悄去问，偏要问出一句话来才罢。金凤连连摇手说："勿晓得，勿晓得！"子富道："情愿哉！"翠凤把手削脸羞金凤。珠凤坐在靠壁高椅上冷看，也格声要笑。子富指道："哪，还有一位大太太，快活得来，自家来哚笑。"翠凤一见，嗔道："耐看俚阿要讨人厌。"珠凤慌的敛容端坐。翠凤越发大怒道："阿是说仔耐了动气哉？"走过去拉住他耳朵，往下一摔。珠凤从高椅上扑地一交，急爬起来，站过一傍，只披嘴咽气，却不敢哭。幸值赵家娒来催说："马车来哉。"翠凤才丢开手，拿起床上衣裳来看了看，皱眉道："我覅着俚。"叫赵家娒开橱，自拣一件织金牡丹盆景竹根青杭宁绸棉袄穿了，再添上一条膏荷绉面品月缎脚松江花边夹裤，又鲜艳又雅净。子富呆着脸只管看。赵家娒收起那一套衣裳，问子富："阿要着马褂？"子富自觉不好意思，即取马褂披在身上，说道："我先去哉。"一径踅下楼来，令高升随去。出至尚仁里口，见是两把皮篷车，自向前面一把坐了。随后赵家娒提银水烟筒前行，翠凤挈着金凤缓缓而来，去后面坐了那一把。高升也踹上车后踏镫。四轮一发，电掣飚驰的去了。
第八回终。
